Uniun da catschadurs Muraun Mustér
Dapi 1940 entochen e cun 1942 ein catschadurs da Medel per part stai commembers dall'uniun da catschadurs Muraun / Mustér. Dus catschadurs Medelins han priu part 1941/42 dalla catscha
communabla da quell'uniun. Las empremas tschiarvas eran aunc fetg raras tier nus. Ils da Mustér levan pia far manever pli grond en las Cavorgias, principalmein sin tschiarvas, mo quei di ha
ei dau ora nuot auter ch'ina mondura bletscha ed il guoter da vinars vits.
Uniun da catschadurs Vallatscha Medel / Lucmagn
Da s. Silvester 1942 han ils suandonts catschadurs Medelins concludiu da fundar in'uniun da catschadurs enta Medel: Lutz Theofil, Venzin Emil, Beeli Clau, Pally Clemens, Beeli Martin fravi, Lutz
Walter, Venzin G. Fidel e Bundi Luis 21.
Ils 10 da schaner 1943 ha giu liug ell'ustria dalla Posta a Curaglia la fundaziun definitiva ed elegiu la suandonta suprastonza:
President: Lutz Theofil
Cassier: Beeli Clau
Actuar: Pally Clemens
Daventai commembers dall'uniun cantunala
Ei era temps da mobilisaziun ed ils biars da nos catschadurs eran sin ils confins e pauc a casa, aschia ch'il contact mava empau a piarder e las radunonzas eran scartas. Igl onn
1943 ei la catscha stada aviarta il september mo treis dis, entgins han survegniu congedi e saviu ir lu igl october diesch dis a catscha.
Quei onn ei vegniu manau atras negina catscha communabla. L'emprema scuntrada da quen havein fatg sin la radunonza generala dils 15 da december 1945. Quella sera mussava il quen ina facultad da sfr. 125.30. Medemamein havein approbau las statutas da nossa uniun, las quallas nossa suprastonza haveva stuiu preparar per daventar commembra dall'uniun cantunala da catschadurs.
Ils 2 d'avrel 1945 essn vegni pri si en l'uniun cantunala.
Nossa uniun dumbrava lu 13 commembers.
Da marcar eis ei aunc che l'emprema tschiarva (vacca) enta Medel ei vegnida sittada da nies bien amitg Martin Beeli fravi, igl onn 1940 sin ils uauls Soliva e quei cun buis da schrecs.
Lavurs communablas e prestaziuns da nossa uniun
Bia lavur gratuita ei tuccau da far da nos commembers naven dalla fundaziun entochen oz. Baghegiau stan da sittar, schau far meisas e bauns, pagau premias per tener sut las uolps, pervesiu
tschiarvas e cavreuls onns cun grondas nevadas ed er susteniu tirs cantunals e regiunals.
Mes ora 1946 tschun muntanialas sin l'alp Soloiva, e lu puspei 1976 tschun tocs. Igl onn 1964 menau tier las muntanialas a Pastg Platta e s. Gions, quellas eran vegnidas pegliadas da nies
guardia-catscha sin i lterritori dil lag da s.Maria.
Concludiu 1965 da metter ora in colonia capricorns s'igl intschess dil Caschleglia. 1967 ha quella colonia survegniu ina nova partida. Concludiu da far in asil federal "Pez Vial". Naven da 1945
fixau cun il guardiacatscha ils novs asils da catscha
Menau atras dus tirs regiunals, igl emprem 1968 catscha aulta e bassa e l'auter 1972 mo catscha aulta. 1963 fatg in viadi a Luzerna e 1971 in viadi en l'Austria. igl onn 1974 havein elegiu igl
emprem cau da tgira.