tir inter 2013

Dumengia, ils 18 d’uost ein nos commembers puspei semiserai agl usitau tir intern. La lescha da catscha prescriva che mintga catschadur ei obligaus da sittar en siu uaffen avon catscha. Cun quels diesch siets sin la schiba da camutsch e quella da muntaniala ein las premissas dadas che la buis funcziunescha endretg.

Uonn han gest 3 commembers frequentau igl emprem plaz cun il medem resultad. Daniel Bundi gudogna cun 88 da 90 puncts encunter Damian
Bundi e Gian-Luca Flepp che fan tuttina bia puncts. Il sté han 29 commembers
sittau alla fin. Quei ei pli u meins era il diember da catschadurs che prendan
la patenta per la catscha aulta.

La sera havein aunc giu la radunonza atunila en nossa tegia a Mireia. Nies guardiacatscha Daniel Bundi che festivescha uonn siu 20avel onn da survetsch tier igl uffeci da catscha e pesca “da cheu anora aunc inaga ina cordiala gratulaziun sin quei giubileum e grond engraziament ad el per la buna collaboraziun cun nossa secziun” ha puspei dau ina cuorta e buna
survesta dallas prescripziuns per la catscha vegnenta. Denter auter
menziunescha el che ca. 20'000 tscharvas vivan el mument sigl intsches dil
Cantun Grischun. Quei ei senza dubis memia bia animals pil spazi da viver che
stat avon maun a quellas selvaschinas duront igl unviern. Aschia ei era il
contingent da tscharvas femininas che ston vegnir sittadas en nossa vischnaunca
puspei vegnius alzaus. Fact ei era che nus vegnin puspei buca a contonscher
quei diember da tscharvas mo cun la catscha dil settember. Per mantener in saun diember da tscharvas en nossa Val cun donns tolerabels egl uaul ed els vitgs
essan nus visai vi sin la catscha d’atun.

A tut tgei che ei segidaus pil bein reussir da quei di
engraziel jeu fetg.

Ursin Venzin, president